Tä mö weyaö lä cuaaö wei jamö, yanowamö täbä jocäa fa culunö, Sinala tä ulifi jamö bä waloquema. Tä lä yalöi tä fa dalalöjenö, bä bälöa yanöcödaliyoma.
Bä fa yanöcöblalunö, bä a̦ wayolayoma. —Bei. Mashita bäma bä da ta, bämacö yafimobä. Cowa wacö ja, bäma bä fa jifumalönö, cofibö bä cublobä —bä nowa tayoma. Inaja bä fa cuaanö, maa mabä mlai ja, mashita bä li jifuwä shömomamaje. Maa anö bä jou mlaobä, bä lä sudimaö wejei toubä ca̦i bluca ajedemabou yädäo showaomaje.
Abinaja bä cuu nomöjöoma. —Bei. Eja bämacö bälödiobä, yafi bluca bäma bä da ta. Yafi ösöwä dodijiwä bäma a ca̦i i̦tamaö showadaobä. Judu mösö jamö, a yafi ola fe wädöodayobä. Bämacö nö wa̦lojoablalou dodijio ja, bämacö a̦fa wayoamou blaucobä. Jödödöwä tä ulifi jamö, bämacö shelelou dicoo mlaobä —bä cuma.
Bä lä yafimono wei jamö, Jeobaanö bä yafibö möbä a itolayoma. Yafi ösöwä a ca̦i nia fa möönö, yanowamö täbä nija a waloqueyoluma.
Tä fa dalalöfälönö, abinaja Jeobaa a cuu co̦joloma. —¿Ö̦jö tawä? Moli bä li cudeenö, moli caficö a̦ ja bä a̦ li wayomayou cudeenö, bä jäomi waiquiwä. Bä a̦ fa ji̦liayonö, cama bä cuaaö bufi lä doblao wei tä ja, bä nö nia ca̦i wa̦lojaö fe yadio.
Bei. Bämacö itou da co̦fälö. Bäma bä caficö a̦ fa shomiblamalönö, bä a̦ ji̦liayou mladobä —Jeobaa a cuma.
¿Ö̦jö tawä? Jeobaa a lä cuinö, inaja showawä bä caficö a̦ fa tablamalönö, yafi bluca bä nia ma i̦tamano wejei ma cui, bä waiquidou showalayoma. Ö̦jamö culanö bä fa shedequeblalunö, jödödöwä tä ulifi jamö bä bälöjöolaliyoma.
If you like this site and find it useful, you can support it by making a donation via PayPal or Patreon, or by contributing in other ways. Omniglot is how I make my living.
Note: all links on this site to Amazon.com, Amazon.co.uk and Amazon.fr are affiliate links. This means I earn a commission if you click on any of them and buy something. So by clicking on these links you can help to support this site.
